وان طال السفر___ محمد عبد الماجد ___الثريا ..ما بتلعب مع (تلاتين عشرة)

 

الثريا ..ما بتلعب مع (تلاتين عشرة)

- الواحد فيكم وقت يمشي ليه مطعم بتاع فول ..يقوم يتلفت شمال ويمين ..ويتنفخ كدا ويمد كرشتو الى الامام ويطلب (فراخ)
- السياسة هي ان تكون هناك ازمة غاز حادة في البلاد ..تقوم انت كسياسي محنك تقفل كبري المنشية
- الحب هو ان تقف في (المرايا) تلات ساعات ...عشان بس تعمل مقارنة بين القميص اللابسو وبين القميص اللابسو في المرايا
- تلاتين عشرة شنو؟...هسع جات الجلكسيات ..تلقوا الواحد بيلحس في تلفونو زي الكاسترد

الثقة شنو؟.
غايتو حسب معرفتي ليها ..ما (كرفتة).
ولا عمة وجلابية ..عشان ما تقعدوا تشرعوا لينا في (اللبس) ساكت.
ولا هي ربع كيلو جبنة.
ما تحاولوا تصلحوا الكلام وتقولوا لي (مضفرة).
مضفرة يعني شنو؟.
ضفروها في كوافير.
ولا هي طحنية كمان.
جيتوني للطحنية.
براكم بتجيبوا (الهوا) لي روحكم.
عليكم اللـه (الطحنية) دي انا لي (15) يوم جبت سيرتها.
البخليكم تفتحوا لي سيرتها هنا شنو؟.
قالوا وردي اكرم فنان سوداني فهو الوحيد الغنى للديوان الديمة مرشوش.
وهو الوحيد الغنى (بناديها وبعزم كل زول عشان يرتاح على ضحكة عيون فيها).
طيب بتقول شنو في ود اللامين البغني (عيونك ديل عيون اهلي)..عليكم اللـه في اكرم من كدا.
وفي عرفة احسن من العرفة دي.
وفي يقين وثقة ..ومودة اكتر من هذه الكلمات.
هاشم صديق كتب (عيونك ديل عيون اهلي حنان زي نغمة في مقطع)..قفل اي حاجة.
لا تقولوا لي الكبري.
ولا تقولي لي محمد علي كلاي.
محمد علي كلاي ..هسع لو جبتوه لي بقول وانا الدخلني في العمود دا شنو؟.
هاشم صديق حددها معانا بهذا المقطع.
عشان كدا (الحبيبة) في الوجدان السوداني ما غريبة ..هي بنت الاهل.
يمكن من هنا وصفت المحبة بالخوة في الاغنية السودانية ...(نسانا حبيبنا الما منظور ينسانا) التى يستنكر فيها ويستغرب بـ (حليل الخوة الما قدر عشانا).
ارجع ليكم للطحنية.
فاكرين بنسى الموضوع.
نحن زمان كنا صغار ...لكن شفوت ..والواحد فينا وقت يمشي على الدكان ويقول عاوز ليه (طحنية)..كان بقول (طحنية) بي كل ثقة.
بيشعر ليك بي فرح غريب.
كأنو سفير.
كأنو بناقش في رسالة الدكتوراه.
فرح طالع من وين؟..ما عارف.
ما عارف الثقة دي كانت طالعة لينا من وين؟.
موش الواحد فيكم وقت يمشي ليه مطعم بتاع فول ..يقوم يتلفت شمال ويمين ..ويتنفخ كدا ويمد كرشتو الى الامام ويطلب (فراخ).
مع (تدخيلة) اليد في الجيب.
يعني انا قدر الطلب البطلبو.
موش طلب (الفراخ) دا بيديك ثقة غير عادية كدا.
تفتكروا (الثقة) عندها علاقة بالطحنية.
اللـه اعلم.
طيب عندها علاقة بالفراخ.
لمن تسألوني سؤال ..ممكن اقول ليكم الف اجابة خطأ..لكن اجابة صحيحة واحدة ما بقدر اقولها ليكم.
زمان جابوا لينا في الجغرافيا ..قالوا لينا ما هي عاصمة سوريا؟.
الوقت داك سوريا كانت جديدة علينا.
لمن نسمع اسم (سوريا) لمن ننضرس ..ما عارفين ليها اي حاجة.
نسمع بيها مرة ..مرة كدا في (البركان) ومرة في (غضب الصحراء).
لكن تاني ما بنعرف ليها حاجة.
مع ذلك كنا بنجاوب وبنقول ..لا الخرطوم ولا القاهرة ولا الرياض ..عاصمة لسوريا.
احسن من نخلي الورقة تمشي بيضاء.
دمشق ما كنا سمعنا بيها الزمن داك.
اكضب عليكم.
وكان بسألوني من الحب.
وكنا بنتجدع في الزمن داك ...(مصطفى محمود) يقصر.
نقعد نتفلسف كدا ..لمن يصدقونا.
ونقول.
الحب هو ان تقف في (المرايا) تلات ساعات ...عشان بس تعمل مقارنة بين القميص اللابسو وبين القميص اللابسو في المرايا.
الوقت داك ..كان بيجيك احساس (اختلاف) كدا.
ما عارف الاحساس داك كان بيجي للزول من وين؟.
ما عارف.
لكن كانت هناك اختلافات.
وكانوا بيسألوني من السياسة.
وكنا بنقعد برة نفكر.
ثم نجيب ونقول السياسة هي ان تكون هناك ازمة غاز حادة في البلاد ..تقوم انت كسياسي محنك تقفل كبري المنشية.
الناس كلها يخلوا الغاز..ويقعدوا يتكلموا ليك عن كبري المنشية.
البقول ليك النيل الازرق لم يفض مثل هذا الفيضان (200) سنة.
يا ربي النيل الازرق دا كان موقع في مكاتب الاتحاد العام انو ما يفيض.
وانو يظل (لابد) كدا (200) سنة.
يقوم بعد (200) سنة يفيض.
يا همد دا النيل ولّا (عنكبوت).
وطواط هو.
انتوا الواحد فيكم لمن يكون عاوز يهندس ليه كلام ..ما يهندسو كويس.
يخلي الحكاية شوية معقولة.
ما تشطحوا كدا.
خلوها تتبلع.
ما تقولوا ليكم كلام دراب.
برضو الشعب السوداني دا بفكر..وبيعرف..وبقدر الاشياء.
والبقول ليك ..دي (الجقور).
المعنى الجقور ..هي العملت تصدع في الكبري.
انتوا تعالوا هنا ..(الجقور) دي متين انضمت للمعارضة؟.
ومتين بقى عندها (تنظيم) قدر دا ..عشان تصدع كبري المنشية.
نحن كان عندنا جقور بالقوة دي ..تفتكروا كانت بتحصل لينا ازمة في الغاز.
والبقول ليك المشكلة في الشارع ..ما في الكبري.
طيب وقت المشكلة في الشارع يا همد ..ما تقفلوا الشارع ..بتقفلوا الكبري ليه؟.
الكبري ذنبو شنو؟.
زي الزول البقول ليك عملت لي مشكلة مع المدير ..قمت طلقت (المرا).
المرا ذنبها شنو؟.
والبدخل ليك البيت ..يعمل ليك مشكلة لي رب السما مع (المرا) ..عشان شنو؟.
عشان نسى (الباقي) عند الكمساري.
زمان ايام التلفونات تلاتين عشرة دي كانت يا دوب طالعة.
البكون شايل ليه نوكيا تلاتين عشرة ..يا فنان يا مسؤول في الحكومة.
كان الناس من باب الفلهمة والشعور بالثقافة ..الواحد فيهم كان بدخل ليك (التلاتين عشرة) في اي موضوع.
اي جملة مفيدة بتلقى فيها (تلاتين عشرة).
الحاجة من البلد ترسل ليها جواب لي ولدها ..بتقول ليه رسلت ليك تلاتين عشرة ونص ربع بصل.
والولد من الخرطوم كان برد الجواب لي والدته وبقول ليها يا والدة نص الربع بتاع البصل وصل ..وين التلاتين عشرة؟.
تلاتين عشرة دا كان حاجة عالية خالص.
حاجة ما بتتوصف.
الواحد يمشي المطار ..تلاقيه راجع تقول ليه ان شاءاللـه لقيت حجز.
زولكم يقول ليك ..ابدا واللـه لكن قلت ليهم ارجعوا لي في تلاتين عشرة دا.
والواحد كان بمشي عشان يخطب.
اهل البنت اول حاجة بيسألوا من اهل العريس ومن تلاتين عشرة.
العريس يكون عندو تلاتين عشرة ..طوالي واحد من الناس الكبار يقوم يخطب ليك في الجماعة ويقول يا جماعة خير البر عاجله ..نحن لازم نعقد الولد ولدنا ..والبنت بنتنا.
والزول وقت يكون عندو تلاتين عشرة ..كان وقت يقوم يبشر على الفنان او العريس تلقاه رافع تلاتين عشرة فوق.
الناس دي كلها تتفرج.
تلاتين عشرة هسع انتهى.
الموضوع قفل.
تلاتين عشرة شنو؟.
هسع جات الجلكسيات ..تلقوا الواحد بيلحس في تلفونو زي الكاسترد.
يمين يلقوك شايل الايامات دي تلاتين عشرة مع الجلكسيات دي إلّا يسيروك.
ما بريحوك.
إلّا تمرق من البلد.
الواحد ذاتو لو شايل ليه تلفون ما يا هو ..تلقاه بدسدس في التلفون زي الجريمة.
وقت التلفون يضرب ..يمشي يقيف بعيد ..ويرد على المكالمة.
زي البعمل ليه في حاجة ما صاح.
اها يا جماعة عليكم اللـه ..الهلال دا وقت رعايتو بقت (الثريا)..البلعبنا مع ناس تلاتين عشرة ديل شنو؟.
الجابرننا على ناس قريعتي راحت ديل شنو؟.
ناس بكري المدينة وعنكبة.
وبلة جابر.
عاوزني انسى بلة جابر.
وعلي جعفر كمان.
للامانة كدا بعد (الثريا) دي ..شوفوا لينا دوري كبير ..نلعب فيه.
واحسموا لينا موضوع التلفزة.
عشان (الثريا) دي ..ما بتنقل صورتها إلا مباراة فيها (21) كاميرا للتلفزة.
الناس البترعاهم (الثريا) ما زي الناس البترعاهم (تلاتين عشرة).
الفرق كبير.
شوفوا ليكم قيد (ارعوا) بيه.
نحن تاني الموضوع دا ما بنجامل فيه.
.......
ملحوظة : ناس تلاتين عشرة ديل ..الواحد فيهم إلّا يطلع ليه في مكان عالي..عشان الشبكة تدخل.
هــــوامـــــــــــــش
الليلة ناس تلاتين عشرة ..عندهم مباراة مع تلاتين عشرة.
نحن مشجعين تلاتين عشرة بتاعة عمر بخيت.
تلاتين عشرة بتاعة علي جعفر ..ان شاءاللـه يا رب اللـه ينضربوا.
مباراة طبعا مسيخة شديد.
تلاتين عشرة بقابلوا تلاتين عشرة.
يا ربي الليلة مباراة تلاتين عشرة متلفزة.
قالوا النائب الاول حسم الموضوع.
بكرة عاوزين نشوف (الثريا).
نحن بنلعب كمان.
الموسم بدأ.. يفترض القرارات الارتجالية ..بتاعة الاطاحة بشخص من الجهاز الفني او استقدام شخص اخر ..يجب ان تقف.
ما عاوزين اقالات وتعينات في اثناء الموسم.
لو استمريتوا بالطريقة دي ..اللـه يستر على باتريك ذاتو.
ان شاءاللـه تقيف على محمد الفاتح.
ناس عمر بخيت وخليفة ..اللـه ح يعملوا حاجة.
المريخ تعبان.
......
عاجل : عنكبة لو وصفوا ليه القون بمشي على الفرن.