الاهلي البتضحكو منو في (شندي) عملها فيكم في (الرد كاسل)
ناس بكري المدينة ديل (داقسين) يكونوا فاكرين الاهلي الخرطوم ..اهلي شندي ..والرد كاسل ..مدينة شندي
الحيرة في الشبابيك واقفة متل (الختم) في اصابع العروس..تنسل روحك من بدنك ...تطلع زي الشعرة من العجين
اماتنا كانن ..لو شافنك واقف في خشم الباب ساكت ..بلحقنك بي (كورية) ليمون
امس المواقع تداولت خبر رحيل المصور (صلاح عمر)..زول ما كان عندو اي قضية بي زول...طول يومو شايل كاميرتو عشان يصور الحدث
• ما كنت مصدق.
• ولا كنت عارف.
• ولا كنت قايل المريخ بتعادل مع الاهلي الخرطوم في (الرد كاسل).
• رجعت للجدول ..قلت يمكن المباراة مع الاهلي شندي.
• ويمكن انا ما عارف حاجة.
• يمكن المباراة في (شندي).
• احتمال (الرد كاسل) دا شندي.
• وشندي في الرد كاسل..ما ممكن.
• مرات في انجليزي كدا.
• غايتو الانجليزي البنعرفو ...(الرد كاسل) دا القلعة الحمراء.
• متين ..بقى (الرد كاسل)...(شندي)...ما تسألوني.
• الحكومة تكون طلعت قرار جديد..قلبت الرد كاسل شندي.
• ناس شندي ما بقبلوا بي مسخرة زي دي.
• والله دي (انجليزي) غريب كدا.
• انجليزي مخلقن عديل كدا.
• سبحان الله...القلب اهلي الخرطوم ..اهلي شندي شنو؟.
• قدموا شكوى..قولوا المباراة مفروض تكون مع الاهلي الخرطوم ..طلعت مع الاهلي شندي.
• ومفروض تكون في الرد كاسل..طلعت في شندي.
• ناس بكري المدينة ديل (داقسين) يكونوا فاكرين الاهلي الخرطوم ..اهلي شندي ..والرد كاسل ..مدينة شندي.
• في علم كدا.
• ما عارف.
• انجليزي الايامات بلخبط.
• انا اصلا ..كتبت عمودي من بدري ..ورسلتو لي بشاشة واحمد الحاج ..ووصيتهم على الصفحات.
• بعد ما رسلت العمود..المريخ قام اتعادل.
• الشوط الاول 2 / صفر للمريخ.
• الشوط التاني ..اتعادلوا.
• ثبت ليك احمد الحاج ..قلت ليهم رجعوا لي عمودي..عاوز اعمل فيه (تعديل).
• اعمل شنو؟.
• ما عاوز اتفاصح شديد ..عشان عندنا مباراة اليوم مع الخرطوم الوطني.
• يقوم الحصل على المريخ امام الاهلي لا قدر الله يحصل علينا من الخرطوم الوطني.
• عشان كدا ..احسن اعقب (فصاحتي) لي بكرة.
• بعد ما نشوف الهلال ح يعمل شنو؟.
• وان شاءالله الهلال ينتصر.
• عشان كدا ..اعرج بيكم مع المريخاب ديل الى مداخل حزينة.
• واخلي الفصاحة دي لي يوم الجمعة والسبت ..والاحد.
• اسبوع تاني ما بحلكم.
• في اروقة الادب العالمي ..هذه الكلمات لـ (راشيل كورن)...كلماته مثل (الخنجر).
• خنجر غير مسموم.
• السم في الخناجر له رائحة الحروف الساكنة.
• والحروف الساكنة لا رائحة لها ..إلّا في كتب في المطالعة القديمة.
• تمسكك (مغصة) لمن تقعد في الواطة.
• لاحظو اني نسيت موضوع الاهلي الخرطوم دا.
• تشخبط في الواطة ..كلمات ما مفهومة.
• عرقك يقطر.
• الدنيا حر.
• والحروف الساكنة متل الدجاجة الراكدة...تحتضن بيض ساكن ..لكن في (21) يوم يخرج هذا البيض للحياة كتاكيت.
• تخرج الحياة كلها من تلك (السكنة).
• ضجيج ما بعدو ضجيج.
• يا سبحان الله.
• الحيرة في الشبابيك واقفة متل (الختم) في اصابع العروس.
• تنسل روحك من بدنك ...تطلع زي الشعرة من العجين.
• اهـ..من ذلك الذي يأتي بعد فوات الاوان..فيدخل في فصول النفس ...تقفل عليه الفصل الخامس.
• تعاين في جدول الحصص...تلقى الحصة الرابعة (ملافحة).
• تقعد تلافح.
• تطلع الحيرة ..تقطع في (لهاتك) متل كلاب الحر.
• تدخل..
• الدمعة محبوسة ...والراجل الكلمتو مسموعة في البيت بكورك في زوجتو من واحدة إلّا ربع ..يا ولية سخني الملاح.
• القراصة ..اكتشاف سوداني خالص.
• لو جاتنا (القراصة) من الانجليز ..كنا الى الان بنكون فاتحين خشمنا ..وشادين اكمام القميص.
• لمن نتحير ..بنلوك يد القميص.
• ولمن نتحير اكتر المكوة بتشيل الكم كلو.
• مكوة الفحم ما في متلها.
• تنفخها بي خشمك ..الرماد يطير ...تقع فيك (شرارة)..امك من جوة من غير ما تشوفك ..تحس بي حرقتك.
• زي كأنها الاتحرقت هي ..تقعد تصبر فيها..وتنزل في الواطة عشان تقنعها ان الموضوع ما فيه اي حاجة.
• اماتنا كانن ..لو شافنك واقف في خشم الباب ساكت ..بلحقنك بي (كورية) ليمون.
• وكانن زي الكأنهن هن البشربن الليمون ما انت.
• يرون وقت تشرب..ويقشن خشمهن.
• يشبعن وقت تاكل.
• ويفترن وقت تتعب.
• وينعسن وقت تنوم.
• لمن تفرح ..سنونهن بيظهرن ..وضحكتن بتمرق برة خشمهن.
• يملحن من خشمهن عشان تاكل.
• وقت تخنق ..(القحة) تطلع منهن قبلك.
• وقت تنجرح ..دمهن هن البجري ما دمك.
• اماتنا ديل ..كانن في قنانة الشاي ..في ريحة نار الحطب.
• يداخلنك في لون بشرتك.
• ويطلعن بالدس عشان يخشنك عديل.
• اماتنا ديل.
• زمن.
• تاني عاوزين شنو اكتر من كدا؟.
• ولا حاجة.
• ما في (فسحة) اكبر من كدا بين الروح والشارع.
• بين انك ترجع ..ولّا تكمل المشوار.
• لاحظو اني نسيت موضوع الاهلي الخرطوم دا.
• راشيل كورن الفي السطر الاول داك كان يقول : (اليوم..لأول مرة ..وبعد
سبع سنين طوال ..أرتدي ثوبا جديدا ..لكنه قصير جدا على حزني...ضيق جدا على
محنتي..كل زر ابيض من ازراره يسقط مثل دمعة ..من ثنايه ، ثقيلة كأنها
حجر!).
• الحزن عندو (فرامل).
• الحزن مطلوق ساكت.
• مفكوك يتفّ في روحك زي البن.
• وإلّا براي يا ربي قاطع (الاوهام) دي من رأسي.
• وشايل (مويتي) على الرهاب.
• قاعد في السهلة من العطش.
• ملاية الحزن ..قديمة ومهرودة في النص – اطرافها متاكلة.
• مكرفسة.
• لمن يجيكم (ضيف) البيت كلو بقعد يشد في الملايا دي من اطرافها الاربعة.
• كل مجموعة تجر من اتجاه.
• عندما يضرب تلفونك...
• تنظر للرقم باستغراب...وتقول رقم غريب..يا ربي المات منو من الصباح كدا؟.
• التلفون دا نفسي ابتو.
• زول مات.
• تقوم ..تمشي بعيد.
• تقعد في الواطة ..وتخت يدك في رأسك.
• الرأس بقى كعب ..ما بشيل حاجة.
• زي (الحُقة) الاتاكلت اطرافها.
• لا حول ولا قوة إلا بالله.
• وترجع تقول ليهم عثمان مات.
• ولا محتاجين يقولوا ليك عثمان منو؟.
• كلهم يطلعوا من جوة بي احزانهم.
• الموت بقى ساهل.
• بقى زي شراب الموية.
• ونحن ما بنتعلم.
• ولا بنفهم.
• ولا بتقع لينا الاشياء دي.
• يكرروا لينا الحكاية الف مرة ..وبرضو ما بنفهم.
• جاريين في جرينا.
• قبل ايام ..تداولت مواقع التواصل ...خبر رحيل (5) من شباب هذه البلد .. شباب في مقتبل العمر.
• الحياة عندهم تنضح بالحياة.
• شبابهم ..يتدفق في ملامحهم.
• شعور (الخوة) بجيكم منهم من غير ما تعرفهم.
• فيهم كل جديد.. الطموح ..والامل والشباب.
• والاشراق.
• اكبرهم سنا عمرو (31) سنة ..الخمسة رحلوا ..غادروا الحياة ..وما اتعلمنا.
• ولا وقفنا.
• رحلوا الخمسة في حادث حركة على شارع مدني في منطقة سوبا.
• الخمسة يعملون في وظائف مرموقة في شركات معاوية البرير.
• غادروا الحياة ..ومضوا هكذا فجأة.
• الوجع كان يوزع على الناس – في مواقعهم ..حتى الما عندو تلفون ..يأتوا اليه متوجعين.
• يجيك زول شايل ليه تلفون شوف الشباب ديل ماتوا في حادث.
• زي كأنهم مننا.
• او نحن منهم.
• في قصص الموت الكثير من العبر والمواقف والدروس.
• لكننا لا نعتبر.
• ونحن جاريين.
• ونحن ناسيين.
• وما جايبين خبر.
• رغم من اننا في كل يوم نفقد عزيز.
• في كل يوم نفقد قريب.
• وتاني نقوم جاريين.
• تاني ننسى ..وتغشنا الدنيا.
• نحن ماشيين وين؟.
• ازمة الغاز.
• كيلو اللحمة.
• صف الرغيف.
• الكبري مقفول.
• والاهلي اتعادل مع المريخ ..يعني شنو؟.
• ترجع البيت ..تلقى الشارع قفلوه.
• الصيوان بقفل الشارع.
• الحاصل شنو؟.
• عبدالرحمن مات.
• يا جماعة ..عبدالرحمن الصباح دا كان واقف معاي في العمود دا.
• الموت ما بعرف الحاجات دي.
• خلاص الايام تمت.
• ولا حول ولا قوة إلّا بالله.
• الحزن كان حاضر بي قففو ..وشوالاتو وسباتاتو ..يوم ان رحل (البلولة).
• الهلالاب كلهم شعروا ان (البلولة) دي زولهم.
• البعرفو والما بعرفو.
• قعد يتوجع.
• امس ..كان الحزن حاضر من عمق اخر.
• امس المواقع برضو تداولت خبر رحيل المصور بصحيفة الصحافة (صلاح عمر).
• زول ما كان عندو اي قضية بي زول.
• طول يومو شايل كاميرتو عشان يصور الحدث.
• في النهار ..في الليل ..في البرد ...جادع ليه شنطة في كتفو ...ماشى عشان يصور.
• حبات الشيب على رأسو ..ما خلتو يكسل شوية ويتقل على الكاميرا.
• اصلو ما قال لي زول (لا).
• ما حصل قال انا فتران.
• ولا صرّ وشو.
• ولا قعد يطنطن.
• عملنا مع (صلاح عمر) في جريدة الصحافة ..وكنا بنتعلم منو.
• ولا بقول ليك عاوز يعلمك.
• بنقل ليك المعلومة والوصية ..من غير ما تشعر.
• ومن غير ما يحسسك انك ما عارف.
• تتسلل معلوماته اليك ..من غير وسيط.
• صلاح عمر ..رحل امس في القاهرة بعد معاناة طويلة مع المرض..غالب فيها المرض في صبر.
• كان المرض بنهش في جسمو ..وهو واقف وثابت.
• لا كل ولا مل ..حتى في احلك اللحظات.
• بقينا ....فجأة كدا يجيبوا لينا الخبر.
• صلاح عمر (مات).
• تقيف تتبرجل ..ما تعرف تعمل شنو؟.
• تقول ايه.
• ولا حاجة ..تمت الايام.
• اللهم ارحمه واغفر له ..واسكنه فسيح جناتك.
• ....
• ملحوظة : ولا حول ولا قوة إلّا بالله.
هوامش
• دنيا.
• مباراة الهلال اليوم مباراة صعبة.
• التفريط في اي نقطة في الخرطوم ..هو دليل فقدان للبطولة.
• لا بد من الانتصار.
• والحصول على النقاط الثلاث.
• الله يكفينا شر الاصابات.
• الهلال في هذا التوقيت ..احوج ما يكون لدعم ومساندة الجمهور.
• خلوا المدرب يعمل الفي رأسو.
• ما تقاطعوه.
• ما تلافحو.
• خلوه يعمل اي حاجة.
• ما في زول يقاطع المدرب.
• عاوزين نشوف فهمو.
• الحوادث بقت اكتر من الشوارع.
• والسرطانات بقت اكتر من الناس.
• الله يحمي الناس ويشوفهم.
• خلوا كورتنا تنتهي الليلة بسلام ان شاءالله ..وخلوا لي المريخاب ديل.
• تاني يا سلك ما اشوفك في (جزارة) ام درمان.
• تاني لحمة مافي.
• 21 يوم ما عاوز اسمع منكم كلمة.
• يعيش غارزيتو.
• ربنا يخلي لينا غارزيتو.
• ...........
• عاجل : نشوف بكرة البيحصل شنو؟.
0 التعليقات:
إرسال تعليق