اعارة صديق علي صالح لمريخ الفاشر
• بعد ان كان صديق علي صالح هو الرئيس الفعلي للمريخ (جمال الوالي إلّاربع) ، اصبح الآن مُلاحق من جانب عبدالصمد محمد عثمان الذي ترك شغله و
(مدارسه) الخاصة وقبل ليكم على صديق علي صالح.
• حددها ليكم مع صديق.
• ارنب نط.
• الفكي صلي.
• ما بصلي.
• جيب السوط.
• الله اكبر.
• عبدالصمد قصد ليك صديق علي صالح عديل كدا.
• دا استهداف رسمي.
• يتخيل لي كدا ان عبدالصمد محمد عثمان اصبح مسيطر حتى على (طبق الفول)
الذي يتناوله صديق علي صالح.
• وبقى عبدالصمد هو البحدد اذا كان صديق علي صالح مفروض ياكل الفول سادة
وإلا يعمل ليه (جبنة) خفيفة كدا؟.
• بي جبنة.
• او بدون جبنة.
• عبدالصمد اظنه يملك ان يحدد لصديق علي صالح ان كان الفول الذي سوف
ياكله بي زيت او بدون زيت.
• معاه (بصلة)..وإلّا ما عاوزين لينا بصلة من الصباح؟.
• وعبدالصمد بكون بحدد لصديق علي صالح (لون) القميص الذي يجب ان يلبسه.
• سادة.
• وإلّا مشخط؟.
• والشارع المفروض يمشي بيه.
• صديق علي صالح كان مسيطر على القطاع الرياضي ..كان يمكن ان يتدخل حتى
في التشكيلة.
• عبدالصمد قصدو.
• صديق علي صالح قدم استقالته من (القطاع الرياضي) سألوه ليه؟.
• قال عشان (استقرار) المريخ.
• يا ود انت.
• يا بتاع (الاستقرار) والمصلحة العليا.
• استقرار المريخ ..نحن في (قندهار) قالوا ليك.
• عبدالصمد جفف ليك منابع صديق علي صالح ..لمن صديق علي صالح بقى يتكلم
عن (استقرار) المريخ.
• انتوا استقرار المريخ يا دوب عرفتوه.
• لمن زيكو شال الكورة واتخارج ..انتوا كنتوا وين؟.
• طلعتوا لينا الان عشان تكلمونا عن استقرار المريخ.
• بالله.
• طلعتوا بتعرفوا (الاستقرار).
• طلعتوا بتفهموا في (الاستقرار).
• سنة يا انا.
• ما في اروع من (الاستقرار).
• ما في احسن من (الاستقرار).
• شفتوا الزول من يبدأ يتكلم ليكم عن (الاستقرار)..اعرفوه ممكون.
• اقنعوا منو.
• اعرفوه ما قادر يقول حاجة.
• اعرفوه غالبكم بالصبر ساكت.
• صديق علي صالح ..اتخارج من القطاع الرياضي …عبدالصمد لحقو ليك في
(المكتب التفيذي).
• في المكتب ما مريحو.
• في قصد اكتر من كدا.
• عبدالصمد بقى يستهدف ليك في صديق علي صالح في المكتب التنفيذي.
• صديق علي صالح بدل ما يعمل ليه (ردة) فعل…قام قدم استقالته.
• من المكتب التفيذي قدم استقالتو.
• تستاهل.
• صديق علي صالح قالوا ليه انت ليه قدمت استقالتك من المكتب التنفيذي؟.
• قال ليهم عشان استقرار المريخ.
• السينما التراجيدية دي شنو؟.
• الحزن دا جبتوه لينا من وين؟.
• طلع لينا من فين (الاستقرار) دا؟.
• المعروف والمعلوم ان صديق علي صالح الى وقت قريب كان بوقع العقودات مع
اللاعبين الذين ينوي المريخ التعاقد معهم قبل اكمال التعاقد بشكل رسمي في
الاتحاد العام.
• وكان صديق علي صالح هو البمشي مع اللاعب الاتحاد العام.
• وهو البتصور معاه.
• وكان صديق علي صالح ..هو رئيس البعثة.
• وهو بتاع (وفد المقدمة).
• صديق علي صالح في المريخ كان اي شيء.
• ما في زول ظاهر في المريخ غير صديق علي صالح.
• الي ان ظهر لينا عبدالصمد محمد عثمان.
• جفف ليك منابع صديق علي صالح.
• عافي منك يا عبدالصمد.
• على الاقل ريحتنا من صديق علي صالح.
• وارتحنا في الدنيا دي من حاجة اسمها (وفد المقدمة).
• وفد المقدمة بتاعة شنو؟.
• غندور مرقها لي امريكا في الظروف المعقدة دي ..ما سمعنا لينا بي (وفد مقدمة).
• وفد مقدمة – انتوا ماشيين ليكم عرس.
• عبدالصمد محمد عثمان ..استلم ليك الامور ..ثبت ليك اول حاجة حكاية (وفد
المقدمة) دي.
• قال ما عاوز لينا (وفد مقدمة).
• انتوا عارفين لو عبدالصمد ترك الامور لصديق علي صالح ..كان صديق دا لو
المريخ عندو مباراة في شندي مع الاهلي كان سفّر ليه (وفد مقدمة).
• عليكم الله يا جماعة – قولوا الحقيقة شندي دي عاوزة ليها (وفد مقدمة).
• عبدالصمد الان استلم ليك الامور كلها في المريخ.
• اي بعثة في المريخ بقى رئيسها عبدالصمد.
• المريخ لو عاوز يقطع (كبري) المنشية ..رئيس البعثة منو؟.
• عبدالصمد محمد عثمان.
• لاحظو اني لي تلاتة ايام ..ما جبت سيرة لي (جقور المنشية).
• جقور المنشية مالي ومالها انا – قاسم معاها.
• على العموم بالطريقة الماشي بيها عبدالصمد دي ..ممكن المباراة القادمة
للمريخ نلقى ليكم عبدالصمد لاعب في خانة بلة جابر.
• بي امانة كدا خانة بكري المدينة ما بقدر عليها.
• إلّا يلعب ليكم في خانة بلة جابر.
• بلة جابر بعتمد على المجهود ..وعبدالصمد (المجهود) ما بقصر فيه.
• ولا بلعب فيه.
• وممكن تلقوا بعد فترة عبدالصمد حوّل استاد المريخ وقلبو (فرن).
• الزول دا بقى اخطر من صديق علي صالح ..بقى مسيطر على اي حاجة.
• ماسك اي شيء.
• بعدين انتوا ما تفتكروا موضوع صديق علي صالح وصل لي هنا – والموضوع
انتهي على كدا.
• لسه المسلسل دا فيه جزء تاني.
• ما تفتكروا الموضوع وقف عند استقالة صديق علي صالح من المكتب التفيذي للمريخ.
• وخلاص كدا.
• عبدالصمد حالف على صديق علي صالح.
• لو صديق علي صالح طلع في التلفزيون وقال خليت المريخ وبقيت اشجع
(الرابطة) كوستي…عبدالصمد ما ح يخليه.
• يخلي وين؟.
• عبدالصمد شكلو كدا ناوي في التسجيلات القادمة يعير صديق علي صالح لمريخ الفاشر.
• عبدالصمد عاوز يطلع ليكم صديق علي صالح من الخرطوم.
• صديق علي صالح ح يمرقها للفاشر.
• يمشي مع مريخ الفاشر يمسك القطاع الرياضي او يبقى حتى امين الخزينة.
• المهم ح يخارجو ليكم من البلد دي زي الباشا.
• ناس المريخ موش مرة اعاروا الباشا الي ليبيا وقت زهجو منو.
• هسع يا صديق علي صالح رتب اوضاعك على مريخ الفاشر ..وخليك عارف اي
(تلكك) منكم ح تتم اعارتك الي ليبيا.
• وليبيا الايامات دي ضربها عجاجتو للسما.
• احسن اتخارج الفاشر.
• عشان الفاشر ذاتها يمكن تاني ما تلم فيها.
• بس خليك عارف يا صديق علي صالح ..الفاشر دي ما فيها (وفود مقدمة).
• ما تمشي تلقي ناس مريخ الفاشر ديل مساكين ..تقوم تعملها ليهم كلها (وفود مقدمة).
• اوعك.
• ناس الفاشر (وفود المقدمة) ما بتنفع معاهم.
• ولا بتخارج.
• عشان المواضيع تبقى واضحة.
• والامور ظاهرة.
• والاولو شرط ..اخرو (نور).
• او الاولو (مهند) ..اخرو نور.
• إلّا يقولوا ليكم الامور بالواضح كدا.
• الزول لو حاول يتظارف معاكم ..ويجيب ليكم الكلام من فوق لي فوق
..الكلام ما بقع ليكم.
• الواحد فيكم لو فهم الموضوع – بعمل ليك فيها ما فاهم.
• عشان كدا احسن الواحد يجيكم بالواضح.
• ………
و
• عزام قضى على (السكر).
• الظاهر عزام ناوي على (العسل).
• الشغل كدا بقى واضح.
• ما تمشوا تندروي لينا ساكت في تنزانيا.
• كلامناكم نحن.
• لماذا لا يعود التاج محجوب للجهاز الفني للهلال بعد اعتذار أحمد آدم؟.
• علما ان مجلس الهلال ظلم محمد الفاتح.
• محمد الفاتح كان شغال تمام.
• وهو حتى بعد ابعاده من الجهاز الفني لم يعترض ولم يصرح تصريح خارج السياق.
• البحث عن الهلال مازال جاري.
• اعملوا حسابكم من مباراة الاحد.
• اذا كان الهلال سوف يلعب يوم الاحد بهذا المستوى يبقى شبه الخروج من
التهميدي يهدد الهلال بشكل واضح وكبير.
• كلو ولا الخروج من التهميدي.
• الاحساس بالمسؤولية وربط الاحزمة في هذه المرحلة ..امر في غاية الاهمية.
• مباراة الاحد ما بتستحمل اي لعب.
• وما عاوزة اي تنظير.
• او استهتار.
• لو لم يحسم الهلال المباراة بثلاثة اهداف نظيفة ..يبقى خروج الهلال من
دور الـ (64) امر قريب.
• ونحن ما مريخاب.
• الخروج من التمهيدي ..لا بنقبل بيه.
• ولا بنتفاهم.
• ……….
• و…
• السيدة (ل) الشاي باللبن في البلد دي قالوا بقى مشكلة – الجماعة ديل
قالوا افصلوا لينا الشاي من اللبن عشان التوجه الحضاري للبلد.
• و…
• وقرّض على كدا.
0 التعليقات:
إرسال تعليق