دق الدلجة..محمد عبد الماجد..المشكلة من بتاع البوفيه ما من المدرب 3 فبراير 2015م

 

المشكلة من بتاع البوفيه ما من المدرب

• اجمالا كدا ..وعشان الموضوع يبقى واضح ..والشبابيك مفتحة …(والجدادة)
جارية في الحوش.
• اقيف ..في سؤال في الحتة دي.
• حاجة ما مفهومة – ولا مبلوعة.
• ليه وقت الزول يكون عندو موضوع مهم كدا ..بقوم يشوف ليه (جدادة) جارية

في نص الحوش؟.
• فجأة بتقع في نظرك..وما تعرف تصرف كيف؟.
• زي الحافلة البتركبها..وبعد ما تتحرك تلقى فيها خمس نسوان من نسوان الحيلة.
• ما تعرف تمشي وين؟.
• في جماعة بعملوا فيها شالتهم نومة.
• عشان بس يتخارجوا من الكمساري.
• انتوا ما لاحظتوا للحكاية دي.
• هسع الواحد فيكم بكون بقرأ في العمود كدا ..واحد شفقان بقوم يقول ليه
(عليك الله شفت ازمة الغاز الايامات دي كيف؟).
• ازمة الغاز الدخلها هنا شنو؟.
• اوعكم تدخلوا لي ازمة الغاز في عمودي دا.
• لا ازمة الغاز ..ولا تصدع كبري المنشية.
• حاجات زي دي ما تجيبوا لي سيرتها من الصباح.
• خلونا في موضوعنا الاول.
• اول ما تفتح ليك موضوع مهم ..ومفصلي كدا ..موضوع حياة او موت ..بتقوم
تشوف ليك (جدادة) جارية.
• جارية في الحوش.
• حكمة الله ..الجدادة كمان بتكون (منقطة).
• تعتقدوا الموضوع دا عندو علاقة بالحكومة؟.
• الحكومة خلوها.
• تفتكروا عندو علاقة بالمعارضة؟.
• غايتو (الجدادة) دي انا اصلا ما واقعة لي ..اصلا ما قادر ابلعها ..ولا
بعتبرها ناتجة من (صدفة).
• او جاءت من بيت الجيران ساكت كدا ما غير ما تقصد.
• اي حاجة مقصودة.
• اي حاجة مرتبة.
• عشان ما اضيع ليكم الموضوع ساكت ..واعمل ليكم فيها (مفتح)..او انتوا
تشعروا اني عاوز اتهرب ليكم من الموضوع.
• الحاجات لازم تكون واضحة ومرتبة بدون لف ودوران.
• تمشي المطعم ..تقول لبتاع المطعم عاوز فول سادة ..يقوم يعمل ليك فيه (جبنة).
• جني وجن الحركات دي.
• شكلتكم تقوم للسماء.
• وبدون ما تشعر تقول لبتاع المطعم يا زول انا عندي ضغط..بتعمل لي في
الفول جبنة ليه؟.
• ويجيك احساس كدا ..انا الزول دا بس عاوز يكتلك.
• ليه عامل جبنة في الفول.
• تقول ليه عاوز فول مصلح عليه جبنة وطعمية وبيض.
• يقوم يجيب ليك الفول سادة.
• ليه بتاعين المطاعم بعاكسو الزبون كدا.
• لازم الاشياء تتحدد.
• وتكون واضحة وصريحة.
• احددها معاكم.
• الهلال امام الامل امس الاول ..ما كان مقنع.
• ولا تغشوا نفسكم ساكت.
• اصلو ما قدم كورة.
• شكل الهلال كان مفكك ..والمواضيع ظاهر عليها ما ظابطة.
• حكاية ان الهلال انتصر بثلاثية نظيفة على الامل عطبرة ..ما تغشكم.
• وما تعتبروا المواضيع كدا كويسة.
• شفتوا من الكاردينال يجيب سيرة (الجوهرة الزرقاء) وبداية العمل وانطلاق
المرحلة الاولى ..اعرفوا طوالي ان موضوع كورة القدم ما ظابط.
• وان المواضيع الفنية فيها مشكلات.
• شنو بعد اي مباراة يقوم يفتح لينا موضوع (الجوهرة الزرقاء).
• نحن حركات جمال الوالي دا ..في المريخ ما قاعدين نقبلها ..تفتكروا
نقبلها في الهلال.
• ولا بنكضب في الحاجات الزي دي.
• ولا بنغشكم.
• شدوا حيلكم.
• الهلال بهذا الشكل ..ح يجد معاناة كبيرة امام الخرطوم الوطني يوم الخميس.
• وح تكون في مشكلة اكبر في البطولة الافريقية.
• تقوموا كمان تطلعوا من (التمهيدي) لا قدر الله..نودي وشنا وين؟.
• نقول شنو للمريخاب..الفاتحين لينا خشمهم ديل؟.
• عاوزين …جدية اكبر.
• مسؤولية اعظم.
• وهدوء اكتر.
• روقوا المنقة ..وقدموا لينا كورة مقنعة.
• عاوزين كورة ممتعة.
• شغل الكشافات دا لا بنفع معانا ولا حاجة.
• الهلالاب ديل ..ما ناس (شو).
• ولا بتغشوا ليكم بي هدف – هدفين ..تلاتة.
• لازم تقدموا لينا عروض مقنعة.
• وانتصاركم ذاتو يكون مقنع.
• يمكن في كم لاعب من الهلال محتاج يراجع اوراقو.
• ما عاوزين نحدد…لكن حركات ناس (بلة جابر) ديل في الهلال ما بتنفع معانا.
• ركزوا شوية ..واتخلصوا من الضغوط ..واعرفوا ان اسهل حاجة في كرة القدم
..انك تسهّل المواضيع.
• ما تصعبوا الكورة براكم.
• الكورة ساهلة ..بتصعبوها انتوا مالكم؟.
• زمان نحن كان عندنا فريق في الحلة ..كل (21) يوم كنا بنجيب لينا مدرب جديد.
• ونعمل المشكلة في المدرب.
• ما خلينا لينا خطة ما لعبنا بيها.
• خطط (كتاب المطالعة) جربنها ..ولعبنا بيها في بعض المباريات.
• اي حاجة عملناها.
• وكل مرة بنطلع من المباراة مضروبين.
• الادارة تجتمع بينا ..بنقول ليهم ..شيلوا المدرب ..المدرب دا ما نافع
..وما عندو حاجة.
• الادارة اليوم التاني بتشيل المدرب.
• اصلو ما بتقصر معانا في موضوع زي دا.
• يجيبوا مدرب جديد..بعد (21) يوم يشيلوه.
• ما خلينا لينا حاجة.
• اخر حاجة كابتن الفريق زهج من المواضيع دي ..وما لقى ليه عذر ..كل مرة
مضروبين تلاتة.
• كابتن الفريق رفع ايدو ..وقال لرئيس النادي ..يا ريس نحن شايفين
المشكلة في بتاع البوفيه دا.
• رئيس النادي قال ليه بتاع البوفيه مالو؟.
• الكابتن قال ليه يا ريس ما معقول الواحد يطلب ليه شاي يوم الخميس
..بتاع البوفيه يجيبو ليك يوم السبت..اصلو هو شاي وإلّا فيزا؟.
• رئيس النادي ..قام هاج ليك ..قال الكلام دا بحصل في النادي حقنا دا
ونحن ما جايبين خبر.
• رئيس النادي تاني يوم اجتمع مع المجلس وشال ليك بتاع البوفيه.
• جابوا ليكم بتاع بوفيه (روسي).
• الشاي قبل ما تطلبوا ..بتلقى (الجبنة) قدامك.
• الغريبة ..الفريق بعد ما شال بتاع البوفيه وجابوا ليهم بتاع بوفيه
(روسي) الفريق استعدل.
• واول مباراة الفريق غلب اربعة.
• رئيس النادي ..اجتمع ليك بعد المباراة باللاعبين ..وقال ليهم طيب انتوا
لو كانت دي مشكلتكم ما كان تقولوا لينا كدا من اول الموسم ..بتخلونا نغلط
مع (المدربين) ليه؟.
• المدربين طلع ما عندهم اي ذنب.
• الحاجة الما عجبت اللاعبين ..ان مجلس الادارة قرر حافز المباراة كلو
يحولو لي (بتاع البوفيه).
• وقت بغلب ليكم بتاع البوفيه ..يحفزوكم انتوا ليه؟.
• من اليوم داك عرفت ليك ..سر اي فريق في (بتاع البوفيه).
• بتاع البوفيه تمام..الفريق تمام.
• بتاع البوفيه ما تمام ..الفريق ما تمام.
• الحاجة الما وقعت لي الى الان – بتاع البوفيه دا ..الفهمو شنو بدفاع المنطقة.
• بتاع البوفيه بقي يجينا ليك بين الشوطين ..ويقول لينا انت يا سبعة
تتقدم ..وانت يا عشرة تلعب طرف شمال.
• ونحن نشيل ونفذ في كلامو.
• والفريق ماشى لي قدام.
• لمن يوم بتاع البوفيه قال لينا جاني عرض من الفريق المنافس.
• رأسنا ضرب.
• ورجعنا تاني نتغلب بالدستة.
• عشان كدا لمن اقول ليكم مشكلة الكورة في السودان في بتاعين البوفيه
..بتشيلوا وتغالطوا.
• نحن ساكت شايلنها مع الاجهزة الفنية.
• الاجهزة الفنية دي قاعدة ساكت.
• اللعب عند اصحاب البوفيه.
• ………..
و
• محمد الطيب طبعا لو ما هاجم الحكم ما ببقى (مورينهو).
• اظنهم قالوا ليه لو عاوز تبقى (مورينهو) هاجم حكم المباراة بعد اي مباراة.
• صاحبكم بقى يشيل ويهاجم في الحكم.
• مع (كرفتة) مجلية كدا.
• رحيل البلولة مشجع الهلال ..صدّر كتلة من الاحزان على كل الهلالاب.
• المشجع الذي كان بسيطا ..وكان كبيرا بعشقه للهلال رحل في هدوء.
• و….
• السيدة (ل) ..صمتك مزعج اكتر من تلفزيون السودان القومي.
• و..
• وقرّض على كدا.