وان طال السفر..محمدعبدالماجد...كعب قضية (بكري المدينة) تطلع زي تسجيل (كروز),,,,,الجمعة 13 فبراير 2015

كعب قضية (بكري المدينة) تطلع زي تسجيل (كروز)

 

 

الزمن دا ترسل ليك (شافع) في سنة تانية اساس ..يجيك راجع وهو على اعتاب التخرج من الجامعة

الزول زمان وقت يكون مستعجل ..يقوم يقول للحاجَّة ..اعملي لي حاجة خفيفة كدا ..عشان انا طالع مستعجل ما بنتظر الفطور

الضباح يديك احساس انو موضوع الضبيحة اصعب حاجة في الدنيا..وانو الضباحين ديل ..اطباء جراحين بس ملحقوا في المعلومات العامة

(طيور الجنة) ما عملت فينا خير...غير انها زادت لينا (اوزان) الاطفال وخلتهم لينا زي (البراميل) ما عملت لينا حاجة

• نحن شفنا الكاردينال (مستعجل) شديد ..اتذكرنا الزول وقت يكون مستعجل ولاحق ليه حاجة – بقوم يشيل (قميصو) ويمشي بيه على المكوجي.

• ما بنتظر.

• ولا برسل ليه شافع.

• الزمن دا ترسل ليك (شافع) في سنة تانية اساس ..يجيك راجع وهو على اعتاب التخرج من الجامعة.

• دا لو ما جاك وهو على اعتاب المعاش الاجباري.

• نحن كمان شفّع الزمن دا ما بنعرفهم.

• طيور الجنة علمتهم (فلهمة) ما عندهم ليها رأس.

• ولا عندهم ليها (فهم).

• الواحد فيهم من يشوف ليه (جلاكسي) يقعد يتشبك ليك فيه ..ويفتح ليك الالعاب ويعرج على الرسائل.

• ما يخلي ليه حاجة في الاستديو.

• شفع اخر زمن.

• غايتو (طيور الجنة) ما عملت فينا خير.

• غير انها زادت لينا (اوزانهم) وخلتهم لينا زي (البراميل) ما عملت لينا حاجة.

• المهم موضوع (الشفع) دا ما تشتغلوا بيه.

• دا ما موضوعنا.

• موضوعنا الآني الزول وقت يكون مستعجل يقوم يشيل قميصو ويمشي بيه من الصباح على المكوجي.

• خاصة لمن الكهربة تكون قاطعة.

• ما بتعرفوا قيمة المكوجي إلّا لمن الكهربة تقطع.

• عشان كدا الكهربة لمن تقطع ..المكوجي بعاين ليك ..ويتفحصك.. عاوز يعرفك زبون دائم ..وإلّا جابتك الكهربة.

• لو لقى (الوش) غريب ..بقول ليك ..و الـلـه الهدوم الفي التربيزة دي اسيادها كلهم منتظرينها.

• لكن دا ما حكم.

• انت شيل قميصك وامشي على المكوجي.

• اقيف للمكوجي في رأسو ..لمن يكوي ليك القميص ..طبقو وتعال راجع بيه عشان تلبسو وتتخارج.

• المكوجية الزمن دا إلّا تقيف ليهم في تربيزة المكوه.

• وتساعدهم كمان بي نفخة – نفختين للمكوه.

• لو ما نفخت ليهم المكوة نفخة كاربة كدا ..وشكيت ليهم من غلاوة (الفحم) ما بخلصوا ليك في مكوة القميص.

• اي حاجة عاوزة ليها (فلسفة).

• واي شغلة عندها (نظام) مختلف.

• عشان بس تكونوا عارفين تتعاملوا مع المواضيع كيف؟.

• بي فهم.

• والكاردنيال افتكرناه مستعجل ..وضايق وما برجى الفطور.

• الكاردنيال كان عامل لينا فيها مستعجل.

• اصبروا استعجال الكاردينال ماشي عليكم.

• انتوا قايلننا نحن بنخلي حاجة.

• فاكرننا بننسى.

• خلوني هسع اوقع ليكم موضوع (الاستعجال) دا.

• عشان الموضوع يمخمخ ليكم كويس.

• ويقع ليكم (حطب).

• الزول زمان وقت يكون (مستعجل) ..يقوم يقول للحاجَّة ..اعملي لي حاجة خفيفة كدا ..عشان انا طالع مستعجل ما بنتظر الفطور.

• يهندس الكلام ..يقول ليها ما عاوز اطلع جيعان.

• شفتوا الفهم.

• الحاجَّة ما بتقصر..تقوم تشوف ليها اعظم حتة في اللحمة وتطلعها ليك من التلاجة.

• تسخن ليك اعظم حتة.

• ولا بتعاين لي زول.

• تفطر فطور محترم.

• تقعد تشرب الشاي.

• ويعملوا ليك القهوة.

• ولمن يجيبوا الغداء ..انت ما تطلع!.

• يا ود الناس انت ما قلت مستعجل.

• غايتو الزول وقت يكون ما عندو موضوع – بقوم يعمل ليكم فيها (مستعجل).

• اتاريك بس ..عاوز الحاجة تخصص ليك فطور.

• وما عاوز زول يضايقك ..تقوم من صباح الرحمان وتعمل فيها بتلبس ..عشان تثبت انك مستعجل وانت لا مستعجل ولا حاجة.

• زي الكاردينال.

• الكاردينال قلت ليكم بجي ليكم موضوع استعجالو دا.

• اصبروا بس.

• خلوني اثبت النظرية.

• ماشي عليكم.

• ما في كلمة بتطير.

• ما في حاجة بتنقص.

• ما تشفقوا على فطور الجمعة ساكت.

• مرات بتقيف في خشم الباب تحرس الضباح.

• تقيف ليه في حلقو.

• تبقى ليه في رقبتو.

• يقول ليك جيب (الصينية) ...تجيب الصينية.

• جيب الموية...تجيب الموية.

• جيب الصابونة ..تجيب الصابونة.

• الضباح يديك احساس انو موضوع الضبيحة اصعب حاجة في الدنيا.

• وانو الضباحين ديل ..اطباء جراحين بس ملحقوا في المعلومات العامة.

• هو الطب فيه معلومات عامة؟.

• انا عارف ..الضباحين ديل فاكنها فينا ساكت.

• زي كأنو الضباح ضل طريقه من الطب.

• لو ما الظروف كان مفروض هسع يكون (طبيب)..وعيادتو في شارع الحوادث.

• فهم و الـلـه.

• تقعد تحرس الضباح كدا من الصباح ..لمن ريقك ينفش.

• والضباح ذاتو يعلق فيك ..بي قطعة ..قطعة.

• وانت صابر.

• وساكت.

• عشان شنو؟.

• عشان يطلع ليك (قطعة) من الخروف ..تدخلها البيت يعملوها ليك قبل الفطور.

• انت زول ضايق ومستعجل ..والفطور البجيبوه الساعة واحدة دا ..لا بنفع معانا ولا حاجة.

• بعدين احلي حاجة في الخروف يطلعوا ليك قطعة ..ويعملوها ليك براك كدا.

• تمزمز براك كدا.

• وقت تنفعل مع (العضم) وتخلص ليه ..تدي العضم دقة في كراع العنقريب ..عشان (الطايوق) يطلع.

• ما تسمع الناس البقولوا ليك الموضوع بتاع الطايوق دا ما حضاري.

• في اللحمة ما في احلى من (الطايوق).

• مخمخ يا اخوي.

• وما تشتغل بي زول.

• افتكر بعد موضوع (الطايوق)..الكانوا زمان بعوسوا بيه الكسرة وبمسحوا بيه (الصاج)..احسن ادخل على الكاردينال.

• هسع ما عارف الكسرة بعوسها بي شنو؟.

• غايتو ما شفت لي (طايوق) قريب.

• ولا سمعت بيه.

• الكسرة ذاتها بقت علم.

• العلم دا دخل في اي حاجة.

• نخش على الكاردينال.

• ناس الهلال وقت كان موضوع بكري المدينة في الاتحاد العام ..وكانوا منتظرين الشكوى ..قدوا اضانا.

• كل يوم الصباح يقوموا يهاجموا ليك الاتحاد العام.

• الاتحاد قاصدنا.

• وعماد الطيب حايم بالاذاعات والجرايد يهاجم في الاتحاد.

• الاتحاد ما عاوز يحسم موضوع بكري المدينة.

• والاتحاد بيداغل.

• والاتحاد ..خايف الهلال يمشي الفيفا.

• ونحن نشيل ونهاجم في الاتحاد.

• لو كنا قايلنكم بتجرجروا كدا ..سطر ما كنا كتبناه في الاتحاد العام.

• اتاريهو المشكلة في مجلس الهلال ما في الاتحاد.

• القرار بعد ما طلع من الاتحاد العام ..مشى قعد ليه شهر مع لجنة الاستئنافات.

• فكينا الاتحاد وقبلنا ليك على الاستئنافات ما خلينا ليهم حاجة.

• الموضوع طلع من الاستئنافات ..ومشى ناس الهلال.

• الكاردينال قال اول القال نحن منتظرين الاستئنافات منو؟..نحن مشينا لوزان طوالي.

• ونحن نشيل ونصدق.

• الموضوع هسع طلع من الاتحاد.

• وطلع من لجنة الاستئنافات.

• الموضوع هسع بقى على ناس الهلال.

• وناس الهلال قالوا مشى الفيفا.

• والفيفا بتحسم الامور طوالي.

• الفيفا عندها فروع للديلفري.

• يعني التأخير دا ممكن يكون في الاتحاد العام.

• ممكن يكون في لجنة الاستئنافات.

• ممكن يكون في الهلال.

• لكن الفيفا لا بتتأخر ولا حاجة.

• معقولة الموضوع يقعد عند الفيفا اكتر من ما قاعدو في لجنة الاستئنافات.

• موضوع بكري المدينة دا في الفيفا بتحسم في (20) ثانية.

• و الـلـه خايف زي ما قال حسن فاروق ..ناس الهلال يكونوا باعوا القضية.

• كنا خايفين من الاتحاد العام ..طلعت المشكلة في مجلس الهلال.

• كنا خايفين من اسامة عطا المنان ..المشكلة طلعت في الكاردينال.

• انت يا الكاردينال ما قلت الموضوع دا بتحسم في 48 ساعة؟.

• وينو حسمكم.

• وما قلتوا المحاميين شغالين في الموضوع من نوفمبر الماضي.

• وانت يا عماد الطيب ..ما كنتب بتصرح وبتحلف في الجرايد.

• وينها قضية بكري المدينة؟.

• انتوا بتلعبوا علينا وإلّا شنو؟.

• الموضوع دا لو غلبكم سلموه الامين البرير.

• الامين البرير بحسمو ليك في لحظة.

• ما تقعدوا تتهربوا لينا ساكت ..وتضيعوا لينا القضية.

• الناس بقت ما فاهمة اي حاجة.

• عماد الطيب ذاتو خلى التصريحات.

• والكاردينال بقى سيرة بكري المدينة ما بيجيبها.

• خايف قضية بكري المدينة تطلع زي (كروز).

• ........

• ملحوظة : غايتو بنديكم اسبوع تاني ..لو ما ظهرت حاجة بنمشي الفيفا برانا.

• هوامش

• نحن قلنا ليكم.

• ما تقعدوا تصهينوا لينا ساكت.

• نحن الصهينة ما بتنفع معانا.

• كفاية علينا كروز.

• شنو عاوزين تعملوها لينا كلها (بص الهلال).

• نحن بصات الوالي عرفنا ليها شنو؟.

• بصات الوالي 1750 بص ..ما اقتنعنا بيها.

• انت يا الكاردينال عاوز تقنعنا بي (بص).

• بصك دا ما بجيب الممتاز.

• الكلام الواضح احسن.

• وبكري المدينة دا لو الفيفا وقفتو لينا براهو ما بنقبل.

• إلا يوقوفوا لينا معاه بلة جابر.

• هسع بلة جابر ذنبو شنو؟.

• ...........

• عاجل : قالوا ليك عبدالصمد رئيس بعثة المريخ لمن وصل تنزانيا كان مفتكر (عزام) دا فريق فرنسي.